Скот на 16 мај одржа говор на свеченоста по повод дипломирањето на Kansas City Art Institute. Почетокот на говорот звучеше сосема очекувано. Им честиташе на студентите што стигнале до „прагот на новиот почеток“ и им порача дека нивната „моќ е неограничена“.
Звучи како клише
„Звучи малку како клише, нели? Не делува автентично, нели? Како веќе некаде да сте го слушнале тоа? Тоа е затоа што го напиша вештачката интелигенција“, откри тој.
Потоа го искина хартијата со говорот што го напиша AI, што предизвика смеење и гласно одобрување од публиката. На студентите им порача дека не сакаат „господарите на AI да им кажуваат што е исправно, а што погрешно“.
„Знаете ли што AI не може да направи? Не може да го направи она што вие го правите. Не може да има оригинална идеја. Не може дури ни да разликува добра идеја, уникатна идеја и просечна идеја“, рече Скот.
Страст, идеја, оригиналност
Додаде кое уметниците поседуваат страст, а токму тоа ги разликува од вештачката интелигенција.
„Поради тоа вашата улога како уметници денес е уште поважна од кога било. Во времето и просторот во кој живееме, тврдам дека уметникот е потребен повеќе од кога било“, рече Скот. „Уметникот не ја кажува вистината – тој одлучува како вистината изгледа и како се чувствува. Тој ја свиткува реалноста, додека истовремено служи како огледало на општеството.“
Скот веројатно веќе бил запознаен со реакциите што други говорници ги добија кога за време на обраќањето пред дипломците зборуваа за вештачката интелигенција.
Рано овој месец студентите го извишкаа поранешниот директор на компанијата Google, Ерик Шмит, како и извршната директорка од секторот за недвижности Глорија Калфилд, поради нивните коментари за AI на две одделни церемонии на дипломирање. Негативни реакции предизвика и Скот Борчета на Middle Tennessee State University кога зборуваше за влијанието на AI врз музиката и медиумите.
Загриженоста на дипломците поради вештачката интелигенција не е без основа.
Тие влегуваат на пазарот на труд токму во моментот кога оваа технологија ги менува почетните позиции во многу професии. AI исто така го трансформира начинот на кој компаниите ги проценуваат кандидатите и кои вештини ги сметаат за важни. Најмалку десет големи компании оваа година ја наведоа зголемената ефикасност благодарение на AI како една од причините за отпуштање на вработените.
Дури и надвор од работното опкружување, многу Американци не се воодушевени од сè поголемиот број интеракции со вештачката интелигенција во секојдневниот живот. Исто така, расте отпорот кон големите дата центри неопходни за функционирање на оваа технологија.
Дека ја разбира загриженоста на дипломците покажа и соосновачот на компанијата Apple, Стив Вознијак, кој претходно овој месец одржа говор на Grand Valley State University.
Студентите го наградија со аплауз кога им рече дека тие веќе имаат AI:
„Вистинска интелигенција.“
Извор: webmind.rs
